Home » ዜና » የጄነራሉ የነፃ እርምጃ አዋጅ (ጋዜጠኛ ተመስገን ደሳለኝ)

የጄነራሉ የነፃ እርምጃ አዋጅ (ጋዜጠኛ ተመስገን ደሳለኝ)

ጋዜጠኛ ተመስገን ደሳለኝ

Ethiopian journalist Temesgen Desalegn's response to the General.

በመከላከያ ሚኒስቴር የኢንዶክትሬኔሽን ዳይሪከቶሬት ዳይሪክተር ሜ/ጄ መሀመድ ተሰማ ሐምሌ 1 ቀን 2011 ዓ.ም ወቅታዊ ጉዳዮችን በተመለከተ ጋዜጣዊ መግለጫ መስጠታቸው ይታወቃል፡፡ በርካታ ጉዳዮችንም አንስተው ለማብራራት ሞክረዋል፡፡

በርግጥ የጄነራል መሀመድ መልዕክት ማጠንጠኛ የ‹መከላከያን ስም የሚያጠፉ›፣ ‹አመራሩን እና ሰራዊቱን ለማራራቅ የሚያሴሩ› ጋዜጠኞች እና ሚዲያዎችን ሰራዊቱ አሳድዶ በነፃ እርምጃ እንዲደመሰስ መፈቀዱን ‹ማብሰር› እንደ ነበረ ፕሮግራሙን የተከታተሉ በሙሉ የሚረዱት እውነታ ነው፡፡ ከዚህ ቀደም በነበሩ የተቋሙ መሪዎች በአደባባይ (በሚዲያ) ሲነገሩ ያልተደመጡ ክብረ-ነክና ኃይለ ቃሎችንም ተጠቅመዋል፡፡

‹ዋልታ ቲቪ› እንደ ሌሎቹ የቴሌቪዥን ጣቢያዎች ሳይቆራረጥ ሙሉውን ባስተላለፈው የጄነራሉ መግለጫ ላይ የ‹ፍትሕ መጽሔት› ማኔጂንግ ኤዲተር ተመስገን ደሳለኝን አራት ጊዜ በስም ጠቀሰው በተራ ቃላቶች ከመሳደብ እና ከመዝለፍም በዘለለ፤ ‹የተናደደ ወታደር ለሚወስደው እርምጃ ኃላፊነት የለብንም› በሚል ሽፋን ሰራዊቱ ወታደራዊ እርምጃ እንዲወስድበት የግላጭ ትዕዛዝ አስተላልፈዋል፡፡ መከላከያ ሠራዊት የዜጎችን አንገት መቀንጠስ እንደሚችል በይፋ አስረግጠዋል፡፡ ጉዳዩን አስገራሚ ያደረገው ደግሞ በሕግ ለመጠየቅ ዝግጅታቸውን እየጨረሱ እንደሆነ በመናገር በፍትሕ ስርዓቱ ላይ መሳለቃቸው ነው፡፡

ጄነራሉ ጋዜጠኞችን እና ሚዲያዎችን በጅምላ በስሁት ፖሮፓጋንዳ ለማሸማቀቅ መሞከራቸው ሳይዘነጋ፤ እንደ ቀይ እና ነጭ ሽብር ዘመን ነፃ እርምጃን ለሚመሩት ሠራዊት መፍቀዳቸው ከአንድ ግለሰብ ነፍስ በላይ ትኩረት ሊሰጠው የሚገባ ነው፡፡ ወታደሩ የፈለገውን እርምጃ ወስዶ፣ ‹መናደዱን› እንደ ምክንያት መጥቀስ ብቻ በቂ ነው በሚል ጄነራል መዳፍ ላይ የአገሪቱ ዕጣ-ፋንታ ወድቋል፡፡ ሁነቱ የፍትሕ ሥርዓቱን የናቀ፣ ለራሱ ለመንግሥትም ስጋት የሚፈጥር፣ ሀገራዊ ቀውስ የሚያነብር፣ ለፖለቲካ ምስቅልቅሎሽ መግፍኤ የሚሆን አደገኛ አደጋ የተሸከመ ነው፡፡ የጄነራል መሀመድ አካሄድ፣ የጄነራል ሰዓረ ገዳይ ምናልባት ከደረሰበት ጉዳት መዳን ከቻለ እና ፍርድ ቤት ከቀረበ ‹ሰዓረን የገደልኩት ስላናደደኝ ነው› የሚል ቃል ሰጥቶ በነፃ መሰናበት የማለት ያህል ነው፡፡ ‹የጋዜጠኛ ደም ከወታደር ይቀጥናል› ካልተባለ፡፡ ይህንን ጉዳይ ከግድያው አኳያ ተቋሞ ሰፋ ያለ ምርመራ እንዲያደርግበት ይመከራል፡፡ (ጄነራሉ የአክራሪ ሽብርተኞችን አሰራር በመዋስ በጋዜጠኛ ተመስገን ደሳለኝ ላይ ሰራዊቱ ባገኘው ቦታ እርምጃ እንዲወስድበት ያስተላለፉት መልእክት የተቋሙን አመራሮች በተመለከተ ከዚህ ቀደም ያዘጋጀናቸውን ዘገባዎች እውነታነት የሚጠናክር እንደሆነም ልብ ይሏል)

በጥቅሉ የጄነራል መሀመድ ተሰማ መልዕክት ‹የአገሪቱን ሕግ በግላጭ የናደ› ብቻ ተብሎ በቸልታ የሚታለፍ አይደለም፡፡ በርከታ የታፈኑ እውነታዎች መኖራቸውንም ይጠቁማል፡፡ በተለይ የተወሰኑ የጦር መኮንኖችን ተንተርሶ በሕዝባችን ዘንድ በስፋት ሲወሩ የነበሩ አደገኛና ሕገ-ወጥ ተግባሮች ለመፈፀማቸው ምልክት የሰጠ ነው፡፡ የሃላፊው ንግግር እግረ መንገዱን ተቋሙ ‹አስተዳድረዋለሁ› የሚለውን ሰራዊት ‹ንዴት› መቆጣጠር እንደተሳነው፣ ዲስፒሊን እንደጠፋ፣ ሕግ የሚያከብር ወታደር እንደሌለ ከመመስከሩም በላይ፤ አገሪቷ ያለችብትን የፍርሰት ጠርዝም ጠቁሞ አልፏል፡፡

ጄነራል መሀመድ የመከላከያ ሰራዊት አባላት በ‹ተናደዱ› እና በ‹ተበሳጩ› ቁጥር በፈለጉት ዜጋ እና ግብር ከፋይ ተቋማት ላይ እርምጃ የመውሰድ መብት ማን እንደሰጣቸው ግልጽ ባያደርጉም፣ የሕግ የባላይነትን የገረሰሰ፣ የመንግሥትን ህልውና የካደ፣ ሥርዓት አልበኝነትን የፈቀደ ትዕዛዝ ማስተላለፋቸው አከራካሪ አይደለም፡፡ በአገሪቱ ሕግ ተመዝግቦ እና ፍቃድ ተሰጥቶት በሚሰራ ሚዲያ ላይ በታተመ ሂስም ሆነ፣ በተጋለጠ መረጃ ‹ጉዳት ደረሰብኝ› ባይ አሳማኝ ማስረጃ እስካቀረበ ድረስ በፕሬስ አዋጁ›ም ሆነ በ‹ወንጀለኛ መቅጫ ሕጉ› ፍትሕ ማግኘት እንደሚችል በዝርዝር መቀመጡ ይታወቃል፡፡ ይሁንና ጄነራል መሀመድ እንደ ቀይና ነጭ ሽብር ዘመን ሰራዊቱ በ‹ተበሳጨ› ቁጥር ነፃ እርምጃ እንዲወስድ መንግሥታዊ ሚዲያዎችን ተጠቅመው ፍቃድ እስከ መስጠት መድፈራቸው ከኢትዮጵያውያንም ባሻገር አለም አቀፍ ማኀበረሰቡን ጭምር አስደንግጧል፡፡ የጋዜጠኞች መብት ተሟጋቹ ድርጅት ሲ.ፒ.ጄ እና የሰብአዊ መብት ተከራካሪው አምንስቲ መግለጫውን በቅድሚያ ያወገዙ ኢንተርናሽናል ተቋማት ናቸው፡፡

ከእጅ ወደ አፍ በሆነ ደሞዝ የህይወት መስዋእትነትን በሚጠይቅ ሙያ የተሰማራውን፣ ችግር ያቆራመደውን፣ በአድሎኛ አዛዦች የተገፋውን ሰራዊት፣ ‹ገመናዬ ተጋለጠ› በሚል ግላዊ-ሰበብ በመሀል ከተማ በሚኖሩ ዜጎች ላይ የፈቀደውን እርምጃ እንዲወስድ ማዘዝ (ማነሳሳት) በነፍሰ-ገዳይነት የሚያስጠይቅ ከባድ ወንጀል በመሆኑ፣ የመከላከያ ኃላፊዎች የጄነራል መሀመድ አቋም ተቋሙን የማይወክል እና ያልመከሩበት ከሆነ የፋሽስት ኢጣሊያ ወኪል ጄነራል ግራዚያኒ በአዲስ አበባ ሕዝብ ላይ ያወጀውን አይነት ነፃ እርምጃ በፈቀዱት ጄነራል ላይ ሕጋዊ እርምጃ በመውሰድ የዜጎችን ደህንነት የማስጠበቅ ግዴታቸውን በመወጣት ሊያረጋግጡልን ይገባል፡፡ በተጠላው እና መከራን ባዘነበው ዘመነ-ሕወሓት የነበሩ የጦር መኮንኖች እንኳ ቢያንስ በሚዲያ ይህንን የመሰለ ድፍረት እና ማን-አህሎኝነት ሲያሳዩ አልተመለከትንም፡፡

ከቅርብ ጊዜ ወዲህ አገሪቱን ለአልቦ-መረጋጋት፣ ሕዝብን ለሰቆቃ የዳረገውን አይነት የመንጋ ፍርድ ከደርግ እስከ ኢሕአዴግ ካገለገለ ወታደር የሚጠበቅ አልነበረም፡፡ (ጄነራል መሀመድ ተሰማ በኮለኔል መንግሥቱ ኃይለማርያም ዘመን ኢትዮጵያን ከሻዕቢያ የመገንጠል ተልእኮ እና ከወያኔ የዘረኝነት ፖለቲካ እንዲከላከሉ በወታደርነት ሰልጥነው፣ በባንዲራው ስም ቃለ-መሀላ ፈፅመው ወደ ጦር ግንባር ከተላኩ በኋላ፣ በምርኮ ይሁን በወዶ-ገብነት ባይረጋገጥም የጠላትን ጎራ ተቀላቅለው በአሁኑ ወቅት ለደረሱበት ከፍተኛ ወታደራዊ መኮንንነት መብቃታቸው ይታወሳል፡፡) ዛሬ በእድሜም ሆነ በልምድ በስለው የተዛነፈውን ለማስተካከል፣ የተጣመመውን ለማቃናት፣ የተቀደደውን ለመድፈን… ባይችሉ እንኳ፣ ጋዜጠኛ በአደባባይ እንዲገደል እስከማዘዝ የደረሰ ‹ጥፋት ሊፈጽሙ ይችላሉ› ተብሎ አይጠበቅም ነበር፡፡ የሆነው ግን ይህ ነው፡፡

ጠቅላይ ሚንስትርም ሆነ የጦር አዛዥ፣ ወታደርም ሆነ ወዝ-አደር፣ ጋዜጠኛም ሆነ ቲያትረኛ፣ አርሶ አደርም ሆነ አርብቶ አደር፣ መንፈሳዊም ሆነ መናፍቅ፣ ነጋዴም ሆነ መደዴ… በሕግ ፊት ዕኩል ነው የሚለው የፍትህ ሥርዓቱ አዓማድ የማክበር ግዴታ ጄነራሉንም እንደሚጨምር ማስታወሰ ያስፈልጋል፡፡ በተመስገን ደሳለኝም ሆነ በሌሎች ጋዜጠኞች ላይ ለሚደርሱ ማንኛውም አይነት አደጋዎች እና ጥቃቶች መከለከያ ኃላፊነቱን እንደሚወስድ ለሕዝብ ግልጽ ማድረግ አሰፈላጊ ነው።
ዶ/ር ዐቢይ አህመድ ወደ ሥልጣን ከመጡ በኋላ ሰራዊቱ ላይ የተሳካ ‹ሪፎርም› እንዳካሄዱ ቢናገሩም፣ መሬት የረገጠው እውነታ የተለየ እንደሆነ በማስረጃዎች የተደገፉ ክፍተቶችን በ‹ፍትሕ መጽሔት› በማቅረብ የእርምት እርምጃ እንዲወስድ ለመጠቆም እንደ ተሞከረ አንባቢን ያስታውሳሉ፡፡

3 comments

  1. When people gave support to Abiy Ahmad a year ago, what they DID NOT REALISE that they were supporting eprdf under a different leadership, ie under the leadership of Abiy ahmad.
    Abiy Ahmad has not set up a new political party. or came up with a new political programme. HOWEVER ,WE SUPPORTED HIM BLINDLY, SIMPLY BECAUSE WE BELIEVED HE WAS GOING TO IMPLEMENT THE CHANGE THAT THE PEOPLE FOUGHT FOR AND WERE DEMANDING. By his rhetoric , Abiy appeared to be standing outside of eprdf, promoting a new political programme that will take ethiopia out of ‘abiyotawi democracy’. Abiy created an illusion which blinded people from seeing him as one of the eprdf’s strong men. The hope that he gave to the people MADE PEOPLE TO BELIEVE THAT HE WAS an opponent of the beliefs and views of the political system eprdf created.
    However, we waited for a year, to realise that we were being misled. It took us a year to learn that we were still under the rule of eprdf , under abiyotawi democracy and under the anti-terror law. We looked forward to the end of corruption, lawlessness, injustice and inequality . it was all a pipe dream.
    Abiyotawi democracy is about the dominance of one ethnic group, is about segregatting groups and individuals into ‘enemy’ and ‘friend’ camps. Now we see that in action . opdo has replaced tplf, The anti terror law that was used by the fascist woyane continues to be used as a means to persecute, jail and muzzle individuals and groups.
    What next for Dr abiy ahmad.

  2. the general is not on his own. Behind him is the commander in chief , INSA man Abiy ahmad. he is the real snake.

  3. This general should be suspended

Comments — What do you think?