Home » ዜና » ከጠቅላይ ሚኒስትር ቢሮ የተሰጠ ዝርዝር ጋዜጣዊ መግለጫ

ከጠቅላይ ሚኒስትር ቢሮ የተሰጠ ዝርዝር ጋዜጣዊ መግለጫ

ትናንት ሰኔ 15 ቀን 2011 ምሽት በአማራ ክልላዊ መንግስት ርዕሰ መስተዳድር ቢሮ አካባቢ የክልሉ ርዕሰ መስተዳድርና የክልሉ ከፍተኛ አመራሮች ለስብሰባ በተቀመጡበት ወቅት በክልሉ የሰላምና ጸጥታ ኃላፊ በብርጋዴር ጄነራል አሳምነው ጽጌ የተመራ ኃይል ባደረገው የመፈንቅለ መንግስት ሙከራ የክልሉ ርዕሰ መስተዳድር ክቡር ዶክተር አምባቸው መኮንንና የሕዝብ አደረጃጀት አማካሪያቸው ክቡር አዘዘ ዋሴ ሕይወታቸው አልፏል። እንዲሁም የክልሉ ጠቅላይ ዐቃቢ ሕግ ምግባሩ ከበደ በጽኑ ቆስለው በሕክምና ላይ ይገኛሉ።

የኢፌድሪ የጦር ኃይሎች ጠቅላይ አዛዥ ጠ/ሚር ዐብይ አሕመድ በመፈንቅለ መንግስቱ የተሳተፉ አካላት ታድነው በቁጥጥር ሥር እንዲውሉና የሀገሪቱና የኅብረተሰቡን ደኅንነት ለማረጋገጥ ሥምሪት ሰጥተዋል። በአሁኑ ሰዓት የክልሉ ምክትል ርዕሰ መስተዳድር ላቀ አያሌው ክልሉን በመምራት አቅጣጫ እየሰጡ ይገኛሉ።

ሕገ መንግስቱ ከሚፈቅደው ውጪ መንግስት ለመገልበጥ ሤራ ያቀነባበሩት ብርጋዴር ጄነራል አሳምነው ጽጌ በለውጡ ሂደት ከእስር ቤት በምሕረት የተለቀቁና ኅብረተሰባቸውን ተቀላቅለው እንዲያገለግሉ ኃላፊነት ከተሰጣቸው ውስጥ አንዱ እንደሆኑ የሚታወስ ነው።

በተያያዘም በተመሳሳይ ጊዜ የኢትዮጵያ ፌዴራላዊ ዲሞክራሲያዊ ረፑብሊክ ጠቅላይ ኤታማዦር ሹም ጄነራል ሰዓረ መኮንን እና በጡረታ ላይ የነበሩት ሜጀር ጄነራል ገዛኸኝ አበራ በተቀነባበረ ሤራ በጀነራሉ ጠባቂ በተተኮሰባቸው ጥይት ሕይወታቸው አልፏል።

ጉዳዩ የአንድ ክልል ጉዳይ ሳይሆን ሀገሪቱን በጠቅላላ ለመበጥበጥ የተደረገ መሆኑን በመገንዘብ የፌደራል መንግስቱና የክልል መንግስታት በተቀናጀና በተናበበ መልኩ የኅብረተሰቡን ደኅንነት ለማረጋገጥ በመሥራት ላይ ይገኛሉ።

ሕይወታቸው ያለፈውን አመራሮች በተመለከተ የአማራ ክልላዊ መንግስት ፕሮቶኮል በሚፈቅደው መሰረት የቀብር ስነ ስርዓት የሚያስፈጽም ኮሚቴ ተዋቅሯል። በፌዴራል መንግሥት ደረጃ በወታደራዊ ሥርዓት የተሠውትን ጀነራሎች ለመሸኘት ዝግጅት እየተደረገ ነው።

ጠ/ሚር ዐብይ አሕመድ ለሞቱት ቤተሰቦችና ወዳጆች እንዲሁም ለመላው የኢትዮጵያ ሕዝብ ልባዊ የኅዘን መግለጫ ያስተላልፋሉ።

Comments — What do you think?