Home » ዜና » 4 የ”ሰራዊት አባላት”ን ገድለዋል፣ 10 አቁስለዋል የተባሉት ተከሳሾች ተፈረደባቸው

4 የ”ሰራዊት አባላት”ን ገድለዋል፣ 10 አቁስለዋል የተባሉት ተከሳሾች ተፈረደባቸው

በጌታቸው ሺፈራው

Court charge paper against accused Patriotic Ginbot 7 members.

የፌደራል ከፍተኛ ፍርድ ቤት ልደታ ምድብ 4ኛ ወንጀል ችሎት ዛሬ የካቲት 5/2010 ዓም በእነ ገብሬ ንጉሴ ክስ መዝገብ በአርበኞች ግንቦት 7 ክስ ከቀረበባቸው መካከል ከ2ኛ እስከ 10ኛ ያሉት ተከሳሾች ላይ ከ15 እስከ 16 አመት የእስራት የቅጣት ውሳኔ አስተላልፎባቸዋል።

ተከሳሾቹ ሰኔ 25 እና 26/2007 ዓ•ም ከመከላከያ ሰራዊት፣ የትግራይ ልዩ ኃይል እና የትግራይ ክልል ሚሊሻ ጋር በመግጠም አራት የ”ሰራዊቱ አባላት”ን ገድለዋል፣ 10 የ”ሰራዊቱ አባላት”ን አቁስለዋል ሲል ፍርድ ቤቱ በውሳኔው አንብቧል።

3ኛ ተከሳሽ ስማቸው አምበሉ፣4ኛ ተከሳሽ ባባዬ አዛናው፣ 5ኛ ተከሳሽ አስቻለው ክፍሌ፣ 6ኛ ተከሳሽ ደሴ ክንዴ፣ 7ኛ ተከሳሽ ክብረት አያሌው፣ 8ኛ ተከሳሽ ብርሃን ዳርጌ እና 9ኛ ተከሳሽ አወቀ መኮንን እያንዳንዳቸው 16 አመት ሲፈረድባቸው፣ 2ኛ ተከሳሽ አገናኝ ካሱ እና 10ኛ ተከሳሽ አበረ ፋንታሁን 15 አመት ተፈርዶባቸዋል።

ተከሳሾቹ በጠበቃቸው በኩል ተገድለዋል እንዲሁም ቆስለዋል የተባሉት የመከላከያ ሰራዊት አባላት እንጅ ንፁሃን አለመሆናቸውን፣ ይህም ሽብር ሳይሆን መደበኛ ውጊያ እንደሆነ በመግለፅ ቅጣቱ እንዲቀል ጠይቀዋል። በተጨማሪም ተፈፀመ የተባለውን ተግባር ለግላቸው የፈፀሙት ሳይሆን ከፍ ላለ ሀገራዊ አላማ መሆኑን በመጥቀስ የቅጣት ማቅለያ አቅርበዋል።

ፍርድ ቤቱ መነሻ ቅጣት ብሎ የያዘው 19 አመት የነበር ሲሆን ለ3ኛ፣ 4ኛ፣ 5ኛ፣ 6ኛ፣7ኛ እና 8ኛ ተከሳሾች ከአሁን ቀደም ወንጀል ሰርተው አያውቁም በሚል አንድ ማቅለያ በመያዝ 16 አመት፣ እንዲሁም 2ኛ እና 10ኛ ተከሳሽ የቤተሰብ አስተዳዳሪ መሆናቸውን የሚገልፅ ሌላ ተጨማሪ የቅጣት ማቅለያ እንደያዘ በመግለፅ 15 አመት ፈርዶባቸዋል።

በእነ ገብሬ ንጉሴ ክስ መዝገብ ዛሬ የተፈረደባቸው 9 ተከሳሾች “ተከላከሉ” የሚል ብይን በተላለፈባቸው ወቅት “አንከላከልም” ብለው ለቅጣት የተቀጠሩ ሲሆን በመዝገቡ 1ኛ ተከሳሽ ገብሬ ንጉሴ፣ 11ኛ ተከሳሽ ሻንቆ ብርሃኑ፣ 12ኛ ተከሳሽ ጌትነት ዘሌ፣ 13ኛ ተከሳሽ ተሻገር መስፍን እና 14ኛ ተከሳሽ ሰጤ ጎባለ “እንከላከላለን” በማለታቸው የመከላከያ ምስክር ለማቅረብ ተለዋጭ ቀጠሮ እንደተሰጣቸው ይታወሳል።

Comments — What do you think?

Click here to connect!