Home » ዜና » በወልድያ በተካሄደው ተቃውሞ ወታደሮች በህዝብ ላይ ተኮሱ

በወልድያ በተካሄደው ተቃውሞ ወታደሮች በህዝብ ላይ ተኮሱ

(ቢቢኤን) — በዛሬው ዕለት በወልድያ ከተማ የተካሄደውን ህዝባዊ ተቃውሞ ተከትሎ፣ ፖሊስ ወደ ህዝብ መተኮሱ ታወቀ፡፡ ዛሬ ቅዳሜ ጥር 12 ቀን 2010 በከተማዋ ጠንከር ያለ ህዝባዊ ተቃውሞ የተካሄደ ሲሆን፤ ተቃውሞውን ተከትሎም ፖሊስ አስለቃሽ ጭስ እና ጥይት ወደ ህዝቡ መተኮሱን የዓይን እማኞች ገልጸዋል፡፡ በተወሰደው የኃይል እርምጃም፤ ይህ ዜና እስከተጠናቀረበት ሰዓት ድረስ ቁጥራቸው ያልታወቁ ሰዎች መገደላቸውን እና መቁሰላቸውን ለማወቅ ተችሏል፡፡

ከትላንት በስቲያ ሐሙስ ጥር 10 ቀን 2010 በወልድያ ከተማ የተካሄደው ህዝባዊ ተቃውሞ በከተማዋ ውጥረት እንዲነግስ ማድረጉን የገለጹት መረጃዎች፤ በዚህም የተነሳ የአማራ ክልል አድማ በታኝ ፖሊሶች በወታደራዊ መኪኖች ተጭነው ወደ ወልድያ መግባታቸውን መረጃዎቹ ያክላሉ፡፡ ፖሊሶችን ወደ ወልድያ ከተማ የማስገባት ሂደቱ ቀጥሎ፣ በዛሬው ዕለትም በሁለት ወታደራዊ መኪኖች የተጫኑ የክልሉ አድማ በታኝ ፖሊሶች፣ ከደሴ ወደ ሰሜን ወሎ ማቅናታቸውን ጉዳዩን የተመለከቱ እማኞች ለቢቢኤን አስረድተዋል፡፡

ወደ ወልድያ እንዲገባ ከተደረገው የክልሉ አድማ በታኝ ፖሊስ በተጨማሪም፤ የመከላከያ ሰራዊት አባላት ህዝባዊ ተቃውሞውን ለመበተን የኃይል እርምጃ ሲወስዱ እንደነበር የጠቆሙ መረጃዎች፤ ህዝቡም በምላሹ አጸፋውን እንደሰጠም ገልጸዋል-መረጃዎቹ፡፡ የአድማ በታኝ ፖሊስ ወደ ወልድያ ሲጓጓዝ የተመለከቱ የከተማዋ ነዋሪዎች፤ ከፖሊስ ጋር እስከመታኮስ የደረሰ አጸፋ መስጠታቸውን የዓይን እማኞች ለቢቢኤን ካደረሱት መረጃ ለማወቅ ተችሏል፡፡ በጥይት ከተካሄደው የተኩስ ልውውጥ በተጨማሪም፤ ህዝቡ ድንጋይ በመወርወር ጭምር የኃይል እርምጃ በሚወስዱ ወታደሮች ላይ ተቃውሞን ሲገልጽ እንደነበርም ታውቋል፡፡

የህወሓት አገዛዝ እንዲያበቃ በተጠየቀበት የወልድያ ህዝባዊ ተቃውሞ ላይ በሺዎች የሚቆጠሩ የከተማዋ ነዋሪዎች የተሳተፉ ሲሆን፤ ‹‹ከእንግዲህ በወያኔ መገዛት አንፈልግም!›› በማለትም ለስርዓቱ ያላቸውን የመረረ ጥላቻ አንጸባርቀዋል፡፡ ከጠዋት ጀምሮ በወልድያ የተሰማሩት የመከላከያ ሰራዊት አባላት እና የአማራ ክልል አድማ በታኝ ፖሊሶች፤ በዛሬው ዕለት ወደ ማደሪያው የገባውን የሚካኤል ታቦት ለማጀብ አደባባይ በወጣው የከተማው ህዝብ ላይ የከፋ የኃይል እርምጃ መውሰዳቸውን መረጃዎች ጠቁመዋል፡፡ ከኃይማኖታዊው በዓል ጎን ለጎን ብሶቱን በአደባባይ የገለጸው የወልድያ ህዝብ፤ የህወሓት አገዛዝ ስልጣን እንዲለቅ የጠየቀ ሲሆን፤ የህዝቡን ተቃውሞ ተከትሎም የጸጥታ አካላት ጥይት እና አስለቃሽ ጭስ ወደ ህዝቡ ተኩሰዋል፡፡ በወታደሮች በተወሰደው የኃይል እርምጃ፤ የሞቱ እና የቆሰሉ ሰዎች መኖራቸውን መረጃዎች ቢጠቁሙም፤ ይህ ዜና እስከተጠናቀረበት ሰዓት ድረስ ግን ምን ያህል ሰው ሞቶ ምን ያህሉ እንደቆሰለ ለማረጋገጥ አልተቻለም፡፡

Ethiopian regime forces killed many people in Woldia.

Ethiopian regime forces killed many people in Woldia.

Ethiopian regime forces killed many people in Woldia.

Leave a Reply

Your email address will not be published. Required fields are marked *

*

Click here to connect!