አይ አበሻ! አበሻና ሆድ፤ ክፍል ሁለት (ፕ/ር መስፍን ወ/ማርያም )

December 2, 2013

አበሻ ድግስ ይወዳል፤ ድግስ የሚወደው መብላትና ማብላት ስለሚወድ ነው፤ ለመብላት የአበሻ ምክንያቱ ብዙ ነው፤ ልጅ ተወለደ ብሎ መብላት ነው፤ ልጅ ክርስትና ተነሣ ብሎ መብላት ነው፤ ልጅ አገባ ብሎ መብላት ነው፤ ልጅ ሞተ ብሎ መብላት ነው፤ አበሻ ሰው ቀብሮ ሲመለስ በንፍሮ ይጀምርና ቀስ በቀስ ወደሌላው ይተላለፋል።

Prof. Mesfin Woldemariam

Prof. Mesfin Woldemariam

ሃይማኖትም ቢሆን ለመብላት ካልሆነ የነፍሱ ጉዳይማ በጣም ሩቅ ነው፤ ሕያዋን ለነገሥታት፣ ሙታን ለካህናት ይገብራሉ፤ በሚለው መመሪያ መሠረት
ግብር መቀበል ያለ ነው፤ ክርስቶስ ተወለደ መብላት ነው፤ ክርስቶስ ተጠመቀ መብላት ነው፤ ክርስቶስ ሞተና ተቀበረ መብላት ነው፤ ክርስቶስ ተነሣ መብላት ነው፤ ማርያም አረገች መብላት ነው።

ማኅበርም የሚጠጣው (የሚበላው ለማለት ነው፤) ለመብላት ነው፤ አምላክ በተለያዩ ስሞቹ፣ ቅድስት ማርያም በተለያዩ ስሞችዋ፣ መላእክት፣ ቅዱሳን፣ ሰማዕታት ሁሉ ለመብላትና ለማብላት ያገለግላሉ፤ ወደመንግሥተ ሰማያት ለመግባት አማላጅ ሊሆኑ የሚችሉ ሁሉ ማኅበር ለመብላት ምክንያት ሊሆኑ ይችላሉ፤ የሌሎች አገሮች ክርስቲያኖች በመብል አይመለሱም፤ ገበያቸው በጠገራ ብር ነው፤ ስለዚህም አብሮ መብላት ብሎ ነገር የለም።

አበሻ የሚበላው የመጣውን ሲቀበል ብቻ አይደለም፤ የሚሄደውን ሲሰናበትም መብላት ይወዳል፤ ሞትም ቢሆን ለመብላት ምክንያት ነው፤ ቀብር ብሎ እዝን እያቀረቡ መብላት ነው፤ ሠልስት ብሎ መብላት ነው፤ ለሰባት መብላት ነው፤ ለዓርባው መብላት ነው፤ የሙት-ዓመት ደግሶ መብላት ነው፤ በቀብር ላይም ቢሆን ለቅሶውም ‹‹ሆዴ! ሆዴ!›› ነው።

ለአበሻ ጾምም ቢሆን ለመብላት ነው፤ የጾም ትልቁ ምሥጢሩ ምግብ እንዲናፍቅ ለማድረግ ነው፤ የፍስኩ የተትረፈረፈ ምግብና ጥጋብ ባይኖር ማን ይጾማል? የለየላቸው ጠጪዎች በሁዳዴ መለኪያውንና ብርጭቆውን አርግፍ አድርገው የሚተውት ሲፈሰክ በናፍቆት ዊስኪውንና ቢራውን ለመጋት ነውኮ! ይህ ባይሆን አንድ ጊዜ ሞጣ ያየሁትየበግ ሌባ ለምን ይጦም ነበር? ታሪኩ እንዲህ ነው፤ በሞጣ አውሮጵላን ማረፊያ አንድ የበግ ቆዳ የያዘ ሰውዬ በፖሊሶች ይጠበቃል፤ እንደሰማሁት በግ ሰርቆ ጫካ ይወስድና ቆዳውን ገፎ ለመሸጥ ወደገበያ ሲሄድ ተይዞ ነው፤ የሁዳዴ ጾም ስለነበረ ሥጋውን ለማይጾሙ አውሬዎች ጫካ ውስጥ ጥሎ ነው! አሁን ይህ ሰውዬ የሚጾመው ሲፈሰክ ደህና አድርጎ በናፍቆት ለመብላት ካልሆነ ለሌላ ለምንድን ነው ሊባል ነው?

ሥራም ቢሆን ለመብል ነው፤ ከመኝታው ሲነሣ ጀምሮ እስኪተኛ ቢበላ ደስታውን አይችለውም፤ለገና፣ ለፋሲካ፣ ለእንቁጣጣሽና ለመስቀል ለገናና ለፋሲካ፣ ለእንቁጣጣሽና ለመስቀልም ከሌሊት ጀምሮ ከአንዱ ቤት አንዱ ቤት እየተዘዋወሩ በመብላት ቀኑ ያልፍ የለም እንዴ! በእውነት አበሻ መብላት የሚወደውን ያህል ማብላትም ይወዳል፤ ስሞት! ስቀበር! አፈር ስገባ! … ወዘተ. እየተባባለ የጠገበውን ሰው በቁንጣን እንዲሰቃይ ማድረግ የአበሻ ልዩ የፍቅር መግለጫ ነው! መጎራረስም አለ፤ ፍቅርና ጉርሻ ሲያስጨንቅ ነው እየተባለ ፍቅርና ሆድን ያያይዛል፤ አነጋገሩ አበሻ ለመብላት ያለውን እንጂ ፍቅርን አይገልጽም፤ ማሰጨነቅንና ፍቅርን ምን አገናኛቸው! አበሻ ሌላም ተረት አለው፤ የወለዱትን ካልሳሙለትና የሠሩትን ካልበሉለት ደስ አይለውም ይባላል፤ የልጅ ፍቅር ከምግብ ፍቅር ጋር ተስተካክሎ የቀረበ ይመስላል፤ ደሞም ብቻውን የበላ ብቻውን ይሞታል፤ ይላል፤ ጉድ ነው! ሲሞትም ተከተሉኝ የሚል ይመስላል!! ለነገሩማ ፍቅርምኮ አበሻ ዘንድ ምግብ ነው፤ ሆዴ! አንጀቴ! ጎንደሬዎች ሲያሳምሩት ደግሞ ራቴዋ! ይሉታል።

ዛሬ ዛሬ አበሻ ከማብላት ይልቅ ማጠጣት ይወዳል፤ እስቲ ሰዎች ሰብሰብ ብለው በሚጠጡበት ቦታ ብቅ በሉ፤ ያቺን የፈረደባትን ጉበት ለማቃጠል በአቦ፣ በሥላሴ የማይል የለም፤ ቸገረኝ ብሎ ገንዘብ የሚጠይቅ አይምጣ እንጂ ለማብላትና ለማጠጣት፣ ለአንድ ጥሪኝ ፈሳሽ አበሻ ቸር ነው፤ በላኤ ሰብስ በማርያም ስም አንድ ጥሪኝ ውሀ ሰጥቶ አይደለም እንዴ የበላው ሰው ሁሉ የተሰረዘለት? አበሻ በሆድ አይጨክንም።

ለአበሻ ምግብ ክቡር ነው፤ ስለዚህም ምንም ነገር ሲበላ ተቀምጦ ነው፤ ፈረንጅ ቂሉ በየመንገዱ እንደመጋዣ ያመነዥካል፤ በየመንገዱ ማመንዠክ ምግቡን ማዋረድ ነው፤ ከዚያም በላይ ቆመው ሲበሉ ወደጉልበት ይወርዳል ይላል፤ ለአበሻ ጨጉዋራና ጉልበት በቀጥታ የተገናኙ ናቸው፤ ሳይንሱ የሚለው ሌላ ቢሆንም አበሻ አበሻ ምን ቸገረው?

ለመሆኑ ከሆድ ጋር ያልተያያዘ ነገር አበሻ ምን አለው? ነገርን በሆድህ ያዘው ምን ማለት ነው? ነገርን ማብላላት የማሰብ ምትክ መሆኑ ነው፤ ልጆች ሆነን አይጥ አበላሁት እንል ነበር፤ አሸነፍሁት ለማለት ነው፤ ዛሬም ቢሆን ቁማርተኞች በላሁ-ተበላሁ ይባላሉ፤ አይጥ ከማብላት ገንዘብ ወደማብላት ተለወጠ እንጂ ከሆድ አልወጣም፤

አበሻ በሆዱ የማይዘው ምን ነገር አለ? ፍቅርም፣ ጥላቻም በሆድ ነው፤ ቂምም በሆድ ነው፤ ምኞትም ፍላጎትም በሆድ ነው፤ ተስፋም በሆድ ነው፤ መጥኔ ይስጠው የአበሻ ሆድ! ሁሉን ከተናገሩት ሆድ ባዶ ይቀራል፤ አይ የአበሻ ሆድ! የነገር ስልቻ ከመሆኑ በላይ ነገር አልቆበት ‹‹ነገር እንዳይርበው(!)›› ጥንቃቄ ማድረግ አለበት! የአበሻ ሆድ እህል ቢያጣና ከእህል ባዶ ቢሆንም ከነገር ባዶ መሆን የለበትም፤ እህል ቢጠፋም ነገር አይጥፋ!

የአበሻና የሆድ ነገር በዚህ አያበቃም፤ አበሻ ሲያመው ቡዳ በልቶት ነው፤ ቆንጆውን ሁሉ ቡዳ ይበላዋል፤ ልብ በሉ ለአበሻ በዓይንም ይበላል ማለት ነው! አንዳንዴም ሲያመው መድኃኒቱ ምግብ ነው፤ ለሆድ ቁርጠት ብላበት፤ አበሻ ሲሞትም ለቅሶው ሁሉ ስለሆድ ነው፤ ‹‹የኔ ሆድ፣ ሆዴ እንዴት ይቻለው! ፋሲካን የት ልፈስክ?››

እስከናካቴው ‹‹ሆድ›› የሚባል ቃል ከአበሻ ቋንቋ ፈጽሞ ቢሰረዝ ቋንቋው ብቻ ሳይሆን አበሻም ጉድ ይፈላበታል፤ አእምሮ፣ ኅሊና የሚባሉትን ቃላት አበሻ አያውቃቸውም፤ ተግባራቸውንም ሁሉ ለሆድ ሰጥቶታል።

9 Responses to አይ አበሻ! አበሻና ሆድ፤ ክፍል ሁለት (ፕ/ር መስፍን ወ/ማርያም )

  1. mequ Reply

    December 2, 2013 at 10:49 pm

    what is he belching about? He take it for granted what Ethiopians lend him Ethiopian respect.
    wey gud

  2. DASSENNECH Reply

    December 2, 2013 at 1:05 pm

    ቋሚ ለመንግስት ሙት ለካህን ይገብር፡
    ግሩም ነው፡

  3. Abiy Ethiopiawi+Segawi/wemenfesawi+አቢይ+ኢትዮጵያዊ+ሥጋዊ-ወመንፈሳዊ Reply

    December 2, 2013 at 10:07 am

    ን?ምን?ምን?አልገባኝም? ? ?ፕሮፌሰር መስፍን የሚሉት አልገባኝም?ጦማርዎን የላኩበት ጊዜ ሰንብቶ ነው?ወይስ ይሄ አበሻ ሁሉ ምድረ-ሆዳም ስለሆነ ሕሊናው እየከዳው ነው ለማለት ነው ያለትዕግስት የጻፉት ነው?
    ሰሞኑን “ዑ ዑ ታ!”ላይ ነው ያለነው፤እኔ እንኳን ወደ ኡ ኡ ታው ልወጣ እና የመንግሥትን ሥልጣን እንዲያስረክብ የወያኔ ኤምባሲውን ጽሕፈት ቤት እንድትዘጋ አፌን አሞጥሙጬ ልቤን አምርሬ ብዘጋጅ ኡ ኡ ታው ሳውድ-አረብያ ኤምባሲ ነው ብቻ ቢሉኝም አዝኜም ቢሆን ሄድኩ።ለመሆኑ አህያውን ፈርቶ ዳውላውን አይሰኝም?ኢትዮጵያ ኤምባሲ ከመሔድ ይልቅ ወደሳውዲ ኤምባሲ መጓዝ ወይም በቀላል አቀራረብ ምክንያቱን እና ሰበቡን ለይተን አለማወቅ ነው ወይስ አውቆ የተኛ ሰው(ያኔ አምርረን ወያኔን ለመቃወም ስንወጣ የማይመጡ ሁሉ)ቢጠሩት አይሰማም ሆነና ነው ነገራችን? እናም በዚህ የስነልቡና ጦርነት መካከል ሆድ በምን ስሌት እንደተነሳ አልገባኝም፤እናም እናም ተግባብተናል።

    ))ቅማሎቹን ትተን፣
    አንጠግብም ፎክተን።((((((((
    ፈርተን አህያውን -ለምን ዳውላውን?ለምን ዳውላውን?ለምን ዳውላውን?
    +++++++++++++++++++++
    እነዚህ ቅማሎች፣የተቅመለመሉ፤
    ከሸበጥ ከልዋጭ ዛሬ ፈቀቅ ያሉ፤
    ዘርፈው አዘርፈው ሕዝብ እየገደሉ፤
    በአገራችን ንብረት፣ሐብታም ነን የሚሉ፤
    ሰርተው-ያገኙት ሳይሆን ከድሆች አፍ ነጥቀው፤
    በሚሊዮን ገድለው በሚሊዮን ሰርቀው
    ያደባባይ ሚሥጥር መሆኑም ቢታወቅ፤
    ሁሉም ልቡ ፈራ በደም ለመጠየቅ።፡
    ለምን’ስ ይዋሻል በሰበብ አስባቡ፤
    አጋዚ ቅማሏ ቆማ ካጠገቡ፤
    የምን መፎከት ነው ይለይለት እንጂ፤
    ወያኔ ይፈራርስ በሕዝብ አመፅ-ፈንጂ።
    እናም እናስተውል እንወቅ ለይተን፤
    ቅማሎቹን ትተን፣
    አንጠግብም ፎክተን።
    ደማችንን መጠው፣መጠው ሲያስመጥጡን፤
    ያውም ሳውዲ ልከው በዶላር የሸጡን፤
    አልበቃ ብሏቸው እያስቀጠቀጡን፤
    ከግድያ ስንተርፍ በቁም-መሞት ቀጡን።
    እስከመቼ እንተወው ወያኔ-ባንዳውን፤
    አህያውን ፈርተን-ለምን ዳውላውን?
    ዳውላና አህያን በፍርሃት ሲስሉ፤
    የአባቶች ትርጉሙ ጠሊቅ ነው አባባሉ።
    የዘመኑ አህያ ዳውላውስ ማነው?
    አይተን እንዳላየን በቀን የፈራነው።
    አህያው አጋዚ ዛሬም የመሸበት፤
    በቀን ሰው ይመስላል፣
    ቆዳው ዥብ አለበት።
    ችግራችን ደግሞ ተነግሮ ያላለቀው፤
    ዳውላው እኛ ነን የማንደብቀው።
    ጅቦቹ በቀትር ጅብ አህያም ናቸው፤
    ወቸገል ከሞተ አጡ የሚያናምናቸው።
    እርኩሶች በቀን-ፊት ሰዎች ይመስላሉ፤
    የሕዝብ ደም ሲመጡ ማታ እየገደሉ።
    የትናንቱን ታሪክ መዝግቦታል አለ፤
    እነማን ተገድለው ማን እንዳስገደለ።
    ወገን ሲሻ ርቆ የዕለት እንጀራውን፤
    ሰላሙን ሰርቀውት ንብረት ያፈራውን፤
    ባገሩ አዋርዶ ባሪያ-ሁን ያለውን፤
    አህያውን ፈርተን-ለምን ዳውላውን? ? ?
    እናም እናስተውል እንወቅ ለይተን፤
    ቅማሎቹን ትተን፣
    አንጠግብም ፎክተን።
    ይኸውና ደግሞ ግድያቸው ዘልቆ፤
    በስደትም ታየ ባደባባይ ታውቆ።
    እኮ ጀርባ ማከክ በስቃይ መማቀቅ፤
    ቅማሏ ደም መጥጣ ጥጉን ስትደበቅ፤
    እዚህ እዚያ ቢፎከት ሺህ ቢገላበጡ፤
    ቅማሎቹም በዝተው ደሙን እየጠጡ፤
    መፎከቱ ብሶ ቆዳን መላጥ ሲደርስ፤
    ደም መክፈሉ አይቀርም እስካልሞተች ድረስ።
    እናም እስከመቼ ችግሩን ስታዩ፤
    ምክንያት ከሰበብ ቀራችሁ ሳትለዩ።
    በሰበቡ ጮኸን ውግዝ ብንለውም፤
    በቁም ከመሞት ቢሻል:-
    መፍትሔ አይኖረውም።
    ምሥጢሩ ይሄው ነው የአህያ የዳውላው፤
    ፍርሃት ነፃነትን ባሪያ አድርጎ በላው።
    ወገን አርቆ-ሲሻ የዕለት እንጀራውን፤
    ሰላሙን ሰረቁት ንብረት ያፈራውን፤
    ባገሩ አዋርዶ ባሪያ-ሁን ያለውን፤
    አህያውን ፈርተን-ለምን ዳውላውን? ? ?
    ለምን’ስ ይዋሻል በሰበብ አስባቡ፤
    አጋዚ ቅማሏ ቆማ ካጠገቡ፤
    የምን መፎከት ነው ይለይለት እንጂ፤
    ወያኔ ይፈራርስ በሕዝብ አመፅ-ፈንጂ።
    እናም እናስተውል እንወቅ ለይተን፤
    ቅማሎቹን ትተን፣
    አንጠግብም ፎክተን።
    ባገሩ አዋርዶ ባሪያ-ሁን ያለውን፤
    አህያውን ፈርተን-ለምን ዳውላውን? ? ?

    +++++++መታሰቢያነቱ+++++++++
    በሳውዲና በዓለም ላይ
    በስደት ላይ ለሞቱና አሁንም ለሚሰቃዩ ወገኖቼ።
    ተገጣጠመ፣
    ሕዳር ፬ ፳፻፮

  4. habesha Reply

    December 2, 2013 at 9:45 am

    Great! what a reflection

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>